ក្រុមសមាជិកព្រឹទ្ធសភាប្រចាំភូមិភាគទី៥ (ខេត្តកំពត ខេត្តតាកែវ និងខេត្តកែប) ដឹកនាំដោយឯកឧត្តម ឈួន ឆាម ប្រធានស្តីទីក្រុមសមាជិកព្រឹទ្ធសភាប្រចាំភូមិភាគទី៥ បានអញ្ជើញជួបសំណេះសំណាលជាមួយថ្នាក់ដឹកនាំស្រុក ក្រុមប្រឹក្សាឃុំ ស្មៀនឃុំ និងនាយប៉ុស្ដិ៍នគរបាលរដ្ឋបាលឃុំ ស្រុកឈូក ខេត្តកំពត សរុបចំនួន១៣៦នាក់ នៅសាលាស្រុកឈូក នាព្រឹកថ្ងៃអង្គារ ទី៣០ ខែកញ្ញា ឆ្នាំ២០២៥។

ក្នុងឱកាសនោះ ឯកឧត្តមប្រធានស្តីទី បានពាំនាំនូវការផ្តាំផ្ញើសួរសុខទុក្ខពីសំណាក់ថ្នាក់ដឹកនាំព្រឹទ្ធសភា ជូនចំពោះបងប្អូនប្រជាពលរដ្ឋ ថ្នាក់ដឹកនាំខេត្ត មន្ត្រីរាជការ និងកងកម្លាំងនៅមូលដ្ឋានគ្រប់លំដាប់ថ្នាក់ ប្រកបដោយក្តីនឹករលឹកបំផុត។ ទន្ទឹមនឹងនេះ ឯកឧត្តមប្រធានស្តីទី ក៏បានធ្វើការផ្សព្វផ្សាយអំពីលទ្ធផលនៃសមាជរដ្ឋសភានិងព្រឹទ្ធសភា ជូនដល់អង្គពិធី ព្រមទាំងបានជម្រាបជូននូវសភាពការណ៍នៅតំបន់ព្រំដែនកម្ពុជា-ថៃ ដែលស្ថិតនៅក្នុងភាពស្រួចស្រាល ដោយសារកងកម្លាំងយោធាថៃ មិនគោរពបទឈប់បាញ់ឱ្យបានពេញលេញ តែងតែបង្កអរិភាពមកលើទឹកដីកម្ពុជាឥតឈប់ឈរ។

គោលបំណងនៃជំនួបពិភាក្សានេះ គឺផ្តោតលើបញ្ហាប្រឈម តម្រូវការ និងសំណូមពរនានារបស់មូលដ្ឋាន ក្នុងការរួមចំណែកលើកកម្ពស់ការអភិវឌ្ឍមូលដ្ឋាន និងការផ្តល់សេវាសាធារណៈប្រកបដោយប្រសិទ្ធភាព ដើម្បីធានាបាននូវសុខសុវត្ថិភាពជូនប្រជាពលរដ្ឋក្នុងស្រុករបស់យើងឱ្យកាន់តែមានភាពប្រសើរឡើង។ ជាពិសេសការចុះសួរសុខទុក្ខចំពោះក្រុមគ្រួសារយុទ្ធជនពលី ពិការ ជនភៀសសឹក និងពលករចំណូលស្រុក ដើម្បីប្រមូលព័ត៌មានពីបញ្ហាប្រឈមនិងសំណូមពរ ក្នុងការប្រកបមុខរបរប្រចាំថ្ងៃ រួមចំណែកលើកកម្ពស់ជីវភាពរបស់ប្រជាពលរដ្ឋក្នុងខេត្តរបស់យើងឱ្យកាន់តែមានភាពប្រសើរឡើង…៕

ប្រភព៖ នាយកដ្ឋានព័ត៌មាន